曾經每年坐定定聽叱吒, 到後來放棄咗, 直到依家先再坐喺到睇

(Source: 商台)

曾經，聽叱吒係每年一度放假必做嘅一件大事。

嗰時上網仲係好慢，睇網上直播一定窒到阿媽都唔認得，都係要還原基本步聽番收音機，再實時同朋友喺MSN討論結果。

然後唔知到咗邊一年開始我冇再聽叱吒，我轉咗去聽台灣歌，可能係星光第一代嗰排。

持續咗好耐好耐，我都冇咩點聽廣東歌，嗰排亦都冇乜歌好聽，好多我好鍾意嘅歌手唔知點解突然間消失晒。番大陸嘅番大陸，靜咗嘅靜咗，樂壇得番幾把聲。

嗰排或者係香港最迷失嘅時候。

每年都有人講，叱吒十大都唔知有幾多首有聽過，或者都唔知依家有咩新歌。

今年唔計容祖兒（純粹真心唔鍾意佢，冇原因），我首首都識，唔係聽過一兩次嗰種，係真係聽過好多次識唱。

或者係呢幾年香港人終於明白咩叫香港人，終於明白原來廣東話有幾珍貴。係，呢啲叫本土意識。我終於知道有咩係值得守護嘅時候，我亦都終於識得欣賞廣東歌。

叱吒作為一個頒獎典禮，好多人對叱吒都有好多諗法，由以前到依家，個結果點點點，個present點點點，或者佢嘅結果未必好公正，就好似我好鍾意嘅Gin Lee同方皓玟冇歌曲獎咁（但講真，喺到討論一個唔係公開投票嘅比賽有意思咩？你一早都知佢係咁架啦，你覺得佢反映唔到現實，咁點解你又覺得你諗嘅結果反映到現實，網上世界好大，圍繞你嘅世界好細），亦有人話佢冇俾到歌手好多唱歌嘅機會，等等等等，我唔係唔同意，但對我嚟講，依家叱吒嘅意義係要黎重溫一整年落嚟嘅片段，好多首歌我都聽過好多次，每首歌都陪我度過咗一年嘅某啲時光，睇叱吒就好似睇番呢一年發生過嘅事一樣。

咁點解重溫一年時光唔自己上youtube睇，要睇叱吒？問得呢句，不如問下自己點解要睇頒獎禮？因為我唔會聽唔鍾意嘅人唱歌，我聽得就係鍾意，鍾意就想睇佢地。

因為好鍾意廣東歌，所以今年好想睇叱吒。

你有搵到過廣東歌對你嚟講嘅意義嘛？