因為長大, 所以我們學會了原來時間也有價錢

(Source: Uhdwallpapers.org)

開始工作之後，認識的人越來越多，要出席的飯局也越來越多，有好想去的，也有不想去的，有一堆人的，也有單對單的。

想做的事很多，可是時間太少。想寫書，想煲劇，想睇戲，想打波，想睇書，想讀書，想搞研究，想搞副業，想去旅行。

但年紀慢慢長大，雖然越睡越少也沒太影響精神，但身體卻越來越容易疲累。

雖然有很多事想做，但其實最想做的卻是甚麼也不做。

越晚收工，卻越不想睡。我有很多朋友不明白為甚麼會有這麼反智的想法，可是工作了一整天，只想晚上有更多的私人時間讓腦袋放空，麻醉自己的神經緊張，因為不想立刻睡覺然後起床後又要開工。

所以我寧願累，也想擠一些時間做一些想做的事。

工作多累也會想偶爾見見老朋友，即使可能只有一餐飯的時間，即使晚上吃完飯回家洗完澡就已經要馬上睡覺，還是寧願讓自己累一下。因為朋友很重要。即使他們一句不如港島食咯，那就港島食吧，即使我過完海之後要再過海再過Ｎ耐才回到新界。（係呀，港島嘅朋友，其實新界人一日都係得廿四個鐘架咋）

當時間越來越少，想做的事越來越多，開始計算做這樣不做那樣的後果。從前讀書時間最多金錢最少，所以花多點時間也想賺多點錢省多點錢，走得到去的都不搭車，特別是在英國的時候，單程一磅六，來回就三磅二，三十二蚊喎大佬。以前做專業人士的時候，日日ＯＴ，錢搵多多，連洗錢的時間也沒太多，所以要我排隊？咪玩啦，去隔離間餐廳，貴啲最多我請啦。

時間跟金錢不知為甚麼竟然變成了對立的代表，時間換取金錢，最後我用金錢再買回時間。

一個鐘對我跟對你來說都有不一樣的意義。

我是一個很變態的人，我很喜歡把不同的責任攬上身，工作之外我有很多身份，但更多的時間也彷彿做不完我想做的事。

以前不明白甚麼是priority，以前對我來說priority就是做事的先後次序，當然這樣解釋也沒錯，但以前做完這一件事也一定有時間做下一件事，現在卻變成我選擇做這樣就要放棄另外三四樣。

所以我之前一個月放棄了這個page，因為想有更多時間寫自己的小說。

以前多不想去的聚會也會照逼自己出席，因為不懂拒絕？覺得始終一場相識？我不知道，我更加不知道為甚麼自己會有一秒猶豫的時間。連自己想做的事都沒有時間，我不明白我為何會逼自己去見一些沒有興趣見的人，只能夠怪當年少不更事。

當時間就是金錢，花時間做自己不願做的事，其實就是投資失誤，當然有很多人不太介意金錢賺或蝕，但若果你介意的話，就不要做對自己不利的投資。

有些人明知終將失去，不如早一點放手，把時間放在應該投資的人身上。朋友如是，戀人也如是。

究竟乜野人先會加入林鄭辦公室呢

(Source: 香港01)

（非政治文）

今日唔寫政治，寫人。

呢個問題其實好易答，但我有兩個答案。

有一種人，我相信係絕大部份嘅人，老到嫩都係，即係好似個前學民仔咁，為利益。

呢種唔解釋，個個都明。

第二種人，我好同情呢種人，佢地讀書好叻，由細到大都名列前茅，但所有人見到佢地都只會覺得佢地死讀書，係好勤力，但除此之外，就乜都唔係。

其實喺香港，呢種人已經可以贏晒，你勤力到咁又讀得書，成就上衰極都有個譜。

問題係咩？

呢種人冇朋友。

唔好誤會，唔係話讀得書嘅人就一定冇朋友，我都識好多好讀得書又玩得嘅人，但唔係呢種，而係嗰種由細到大都唔埋堆，日日自己一個自成一角，杯葛整個世界，但同時又好讀得書嘅人。

冇朋友得嚟仲要覺得你地呢班人無聊同低能，淨係識得玩，又唔做正經野，所以呢種人好憎呢個世界，好討厭佢身邊嘅同學。

點解我話同情呢種人？因為通常佢地細個都實俾人玩，實會俾人拎嚟做笑柄，讀書好唔代表會俾人笑，兩件事冇咩關係。但佢呢種人會。

我唔鍾意以貌取人，但我改唔到呢種劣根性，所以睇林鄭辦公室張相，你會睇到有啲人，明明後生細仔／後生細女，著到成個阿叔阿嬸咁嗰種就好大機會係喇。因為呢種人自以為成熟過其他人，所以唔會跟隨潮流，因為覺得潮流係低能。

咁係咪代表讀得書，又冇朋友，著衫就一定核突呢？

其實都唔係。

哈哈哈哈哈哈哈，因為仲有一樣野，我覺得呢樣先係決定性嘅點。

你望真啲，有啲人係唔識笑。

可能佢有笑容，但係佢唔識笑。

分別在於，一個平時都唔笑嘅人，佢嘅臉部肌肉會比正常人僵化，佢嘅微表情會唔一樣，所以將一個平時成日笑嘅人同呢種人放埋一齊，就算一齊唔笑，你都一樣會明我講緊邊個。

呢幾樣野加埋，就係我講嘅第二種人。

咁點解佢地要加入？

因為佢地唔鍾意呢個世界，佢地個世界冇乜快樂，因為細個成日俾人蝦，所以佢地好唔鍾意啲破壞規矩嘅人，呢種人好鍾意規條，佢地好鍾意權力，因為可以管住你呢班人，喺佢眼中，佢係高人一等，我地就係一班壞份子，我地就係一班冇成就嘅人，所以佢覺得自己有能力管理我地。

佢地會加入，真心覺得林鄭冇問題，係偶像，或者第一種人都仲可能會覺得林鄭有問題，佢地純粹都係為錢，但最恐怖係第二種人，只要管得住你地，乜都做得出。

而你睇我講完呢一堆野，我想講，其實林鄭本身都係呢種人。

（以上純粹作者猜測，但可能你又會覺得我估得好啱咁）

不要忽略那個不太起眼的人

(Source: 電影《初戀日記 賤男蜜擾》劇照)

從前讀書的時候總見到某幾個同學身邊總會有不同的人圍著轉，其實難怪，中學年代甚至大學年代，柒頭特別多，好像柒頭多過正常人，中學時代我們彷彿都不知道自己是怎樣的人，我們沒有太多自己的性格，都不太清楚自己喜歡甚麼，有時候我們喜歡一件事，都是因為別人都喜歡這件事。

所以難怪只要有一兩個比較突出的人，大家的焦點都總會落到他們身上，有一兩個樣貌比較好抑或運動比較好，又或者幽默的人，就會吸引到所有人去圍住他們。

但我們總是會忽略了在一旁的男男女女。

或許其他人總是圍著那些突出的人而轉，把我們的目光也吸引過去。

我們太留意那些突出的人，所以從沒有時間發掘過其他人。

我們沒有想過其實只是場合不對，所以其他那些光芒較暗淡的人從沒有機會發揮他們的特點，他們也有自己的性格，只是一般人都會把他們自動過濾掉。

每個人也有自己獨特的一面，只是等待著其他人去發掘。

不要嘗試去追女神然後追不到就獨自坐在一角鬱鬱寡歡。那是自找的，除非你喜歡當悲劇主角，但沒有人會可憐你。

地球有很多人，只著眼於一兩個人，會錯過世界上太多美好的事。

嘗試踏後一步，你會看見更大的圖畫，更多的事。

愛情如是，其他生活上的事也如是。

你會發現原來你沒有留意過的人，也有著獨特能夠吸引到你的性格。

特別是你進入大學或者出來工作之後，你就會看見當初你不屑一顧的人已經變成一個吸引到你的人，但你卻已經無辦法再追求。

而我卻不在那個群組裏面

(Source: Sheknows.com)

那一天一個經常有對話的群組沒有再響起提示。

當你如常的說話，換來的只有幾句回應。

然後我就知道有另一個群組出現了，只是我不在裏面。

有時候總想時間回到那個沒有智能電話的年代，我不太喜歡回望過去，但有時總會有點感觸。有時不是對方低頭用電話而少了互相之間交流的問題，而是有時總有朋友聚會時會有些人突然看完訊息就笑了起來，或者幾個朋友之間說著一些好像你應該要知而實際你不知的事，那種就是outsider的感覺，但自己明明存在於同一個圈子同一個時空之中。

有一刻尷尬得，會懷疑自己在那個地方的存在是不是正確。

明明同一圈的朋友，卻原來之間還有另一個核心。

的確，每個人也會有自己好朋友的圈子，但當一個大圈子完整地把一個小圈子包圍住的時候，那是最差的狀況，但當然小圈子的成員不在大圈子聚會時講inside joke的話，其實沒甚麼大不了，但通常都事與願違，總會有一兩個很「白目」的人（台灣用語，即係唔識睇人眉頭眼額嘅死蠢），習慣性地想到甚麼就說甚麼，而沒有顧及到其實有可能有人不知道他在說甚麼。當聽到inside joke的時候，老實講，除了傻笑或者尷尬笑，又或者跟住笑但明明不知道笑甚麼之外，有甚麼選擇？

當出來見面時他們都說著自己不明白的事情時，你就會知道自己的地位在哪裏。

或許仍然是朋友，好朋友，但有另一個更細的核心出現時，就知道自己永遠隔了一層。

分手學102 - 如果只係想結婚, 不如快D分手搵過個

(Source: Scott County Clerk)

最近有朋友嘅一個女性朋友同佢訴苦，話自己就快三十歲，但拍咗七年拖嘅男友仲未想結婚，到底應該要點做，分手？定係繼續落去？

講乜之前都好，落番句disclaimer先，大家都知我最鍾意戴頭盔。我唔覺得有啲咩問題嘅其實，女性自主，唔一定要結婚嘅，唔好覺得有男人娶咗就代表係人生勝利組，亦唔好覺得過咗三十未結婚就人生玩完，你嘅人生唔應該係男人嘅從屬，但我講得幾好聽都係假，因為我係男人，我可以講得好輕鬆，因為我唔會感受到嗰種同輩係咁結婚而自己好似好pathetic嘅狀態咁（雖然我唔覺得有幾pathetic）。

But anyway，事實上又真係有人會好想結婚嘅，我其實冇得judge你啲乜，每個人總有自己想要嘅野，但首先要搞清楚一樣野。

結婚對你黎講係乜野？

同一樣野對你，同對我，意義上可以好唔同。結婚對我係承諾，對某啲人可能只係同大學畢業證書一樣只係一張紙，咁你呢？

到底你係想結婚，定係想同呢個人結婚？

其實諗得呢個問題，就已經代表你已經唔再愛呢個人，因為對方未想結婚住而諗分手，就代表你已經愛「結婚」呢件事多過愛呢個人。

咁既然都唔愛，就無謂再一齊。

再簡單啲去諗，其實猶豫個位都只係因為付出咗七年嘅青春搞到好似投資失誤咁，但投資得，其實就要有止蝕嘅覺悟，下下諗住等到番家鄉先沽，其實賺唔番舊錢仲要蝕時間，而且仲要唔知番唔番到家鄉。Anyway，我想講嘅係，個男嘅咁，我又唔覺得你磨多一兩年佢會突然想結，或者佢會，但又可能佢唔會，你搏唔搏？到過多兩年你覺得你仲有咁大bargaining power（according to your definition，如果三十係一個關口，三十二應該仲難啲啩）？

所以我覺得你真係有咁想結婚，不如快啲止蝕離場，對你自己好，又唔好累到人地嘛。

寫到呢到，實有人睇到眼火爆，覺得點解我講到反而個女仔先有問題，明明有問題嘅係個男仔，真係愛對方就應該結婚啦。Well，正如我之前有講，「結婚」呢兩隻字對唔同人有唔同意義，對個男仔黎講或者唔係啲乜野，但或者佢好愛呢個女仔，純粹佢唔想結婚，我唔知，我判斷唔到。

我只係睇得到女方嘅觀點，就係對女方黎講，「結婚」其實都唔係啲乜野，只係to do list上面嘅一個item咁大把，我唔係覺得你呢樣野有問題，我只係覺得target-oriented啲咁諗，你想要成功結到婚嘅話，真係分手易啲嘛。

同埋最重要係，唔愛人就唔好拖住人嘛。

其實兩個人一齊，最重要都係愛對方啫。唔愛的話，俾你簽夠一打證書又點啫。

P.S.　我朋友話個女嘅好似真係散咗。

真正愛對方, 唔好晚晚傾電話

(Source: Wallpaperscraft)

又嚟妖言惑眾系列。

其實好多熱戀中嘅情侶都好鍾意講電話，臨訓前講一兩個鐘先收線都係閒事，我明，我都試過，第二日明明要番學都照傾到點幾兩點，好似四點幾都試過，可能有人覺得「超，好早啫」，係嘅，但我以前十二點就訓架喇OK？我仲試過傾到訓著咗添。

Anyway，熱戀時總係有無數咁多野想同對方講，特別係識咗冇幾耐就一齊嘅就越多野傾，講真連對方嘅興趣習慣都未必知晒，就梗係多野講，講完呢堆之後，就開始傾無聊野，晏晝食咗咩都可以講一餐，連隔離同事行過放個屁都講，係，熱戀期就係咁無聊，因為呢啲濕碎野又冇得同朋友講，但熱戀期就正正合理化咗成件事，講真，唔講呢啲野邊有咁多野講。

但叫得熱戀期，就梗係代表有限期，係會結束，進入冷淡期，是但一方會開始想要多啲自己嘅空間同時間，慢慢就唔想講，會覺得無聊。之後會發生咩事？

「你一開始追我個陣唔係成日打俾我架咩？」

「你變咗喇。」

「你以前都唔係咁架。」

「好辛苦你咩依家？你以前追我個陣都係咁啦。」

成日傾電話有咩問題？就係話題始終都有完結嘅一日，話之你由香港傾到美國政局，始終都會傾完所有有趣嘅話題。然後淨番就係晏晝食咗咩，同事講過咩，日日都有新鮮野咩？淨番啲無聊野個陣，你肯定你仲頂得順日日都係咁咩？

有時候有啲事開始咗就停唔到，你冇得一開始講電話然後之後唔講電話，因為你一定會面對人生其中一個難題，「點解依家就唔得呀？」

如果一開始就唔咁做，就唔需要面對呢個問題。

感情係一條Depreciation curve，即係越相處得多感情會越差，咁當然你唔努力去相處都一樣會差啦，即係take a balance，唔好誤會我唔係叫人丟低段感情唔理就會自然好。感情需要時間同距離先有得發酵，喺條curve上面其實隨住越耐唔見就會有越大returning effect，即係有番咁上下時間唔見或者唔相處，其實係會令感情好咗，但成日見成日傾電話只會令段感情depreciate得越快，有時候俾大家一啲空間，段感情先唔會depreciate。

真心想段感情發展落去的話，奉勸一句，傾少啲電話，俾大家多啲空間。

不過都唔會有人聽架喇，唔傾耐啲，一開頭又點會追到喎，係嘅，我明嘅。

分手學101 - 我們做回朋友吧其實等於我們不要做朋友

(Source: Angela Yuen 袁澧林 facebook)

「其實我也知道沒可能在一起，不過我還是想問出一個答案。但不要緊，因為我跟你都是在等一個人，我覺得在你等到那個人之前，我都會為你打氣，不過要是有一天你不用等那個人，你要告訴我。」

「要是我不用再等他，我第一時間告訴你，好嗎？」

「那你也要答應我，要是你找到你的幸福，你也要告訴我。」

「那我們還是朋友嗎？」

「當然！」

以上的是ViuTV劇集《三一如三》大結局莫志凡跟Jolie的對話。

但其實我也跟以前的女朋友分手時也說過類似的話。可能小時候睇劇集睇上腦，我不知道為何十年前我會說得出十年後《三一如三》年代仍然通用的對話。

或許我們曾經相信分手後仍能做朋友，至少我們也會這樣希望分手後仍能做朋友，即使心中有存疑，但那一刻就是想樂觀一點抱著希望。

但後來我們才知道，當一段感情起了變化的時候，就沒有可能走回頭。因為再見面的時候，硬要用一把朋友的聲線說話才發現自己造作得過份，原來自己不懂得把自己放在哪一個位置說話，理智上想當成朋友，卻只想起過往甜蜜的回憶。

我們學習戀愛，卻沒有人學習分手，我們都只能從經歷中學習。

我不是寫從錯誤中學習，因為從來沒有錯誤，我和你也不知道怎樣才是好，沒有一條方程式能夠應用在全部人身上，所以從來沒有「錯誤」，就只有一個對大家比較好的方法。

如果分手是一種傷害，我們無論怎樣做都只有傷害，能做的是去減少傷害。

長大後才發現原來分手時越狠，才是一件最好的事，無論對自己抑或對對方。

有人跟我訴苦，說她的前度說過要做回朋友，卻對她極冷淡，那算是甚麼朋友。

「我們做回朋友吧」，其實等於我們不要做朋友。

其實分手都只是想快點處理好感情再重新開始，或許只有狠一點大家才能早一點解脫。

又或者只要我們不再相信「做得回朋友」這一類的笨話，就其實說甚麼也沒有關係，彷彿那就會變成了一個更美的謊言，讓大家也能豁然地離去。

但若果沒能力玩那裝高尚的遊戲，沒有人會怪你低俗地只顧自己。

[成長教會我的事] 我不再爭拗下去, 只是為了對自己好一點

(Source: MensXP.com)

有人就有衝突，無論是戀人間抑或朋友間，有時是親人，有時是同事，遇到問題一定吵到底，因為我知道只要爭執贏了，就可以免卻很多麻煩，更重要的是，那道氣嚥不下去，一想到那個勝利者的眼神就知道沒有一場交是可以妥協的。

但鬧交是要時間的，而隨著年紀漸長，要贏得一場交所需的時間是與年紀成正比的，因為每個人的想法也已經隨著自己的成長經歷而固定了，沒有足夠大的衝擊也不可能改變得到一個人，但其實有很多時候不鬧交也已經知道結果，做了廿多年人，我沒有太多機會見過人是通過嘈交說服到對方。

也因為嘈交需要的是時間，年紀越大，時間越寶貴。

所以亦只想把時間留給重要的人，而這重要的人也包括自己。有時候氣上心頭，腦海裏即使不是嘈交之中也會浮現出對方惱人荒唐的語句，其實也會佔去很多時間才會在自己腦海裏消失。

筆者最近跟一些人拍檔做一些項目，雖然不是工作，但卻是很綑綁式的，總之不是那麼容易就脫得掉的。我們近乎每天也在嘈交，嘈一些原則性的問題，不要問我為甚麼有那麼多原則上的不合卻會一起做這個項目，總之就抵自己死。每日嘈，嘈到後來我放棄了，因為我花上了太多時間在覆message上面，搞到我自己都做不了其他事，然後我才發現，其實沒有嘈完的一日，因為從來沒有人打算放棄自己的立場。

嘈交，原來真係好混吉。

的確，放棄嘈交在對方的眼中或許是一個失敗者，他的那種勝利者的眼神也不是易受的，但放棄爭吵下去，換回來的是自己的時間，若果那個人是重要的，不吵下去或許對雙方關係也有好處，反正爭吵時都不會聽得入耳；若果那個人是不重要的，更加不要花時間在對方身上，丁點也不要，既然他不重要，他怎樣想你也不重要，或許在他眼中你是失敗者，但一切都不再重要，因為已經不重要得我不想再去想這個人怎樣看自己。對自己好一點，放棄這些跟不重要的人的無謂爭執。